Gen 46 | TUCO | STEP | Tovenen Yakop iyou mbeb toni tisob, ve yesŋa ndinatu ve nditimbu timundig, ve tizila pa Isip. Tilaagh tila le tivot ndug Ber-Seba, ghoro ye igham watooŋrau pa Maaron to tama Isak izi tonowe.

aMbnp 12:2; 50:1

bMbaŋ 7:15

cMbnp 38:7-10

dIgham 1:5; Mbaŋ 7:14

Genesis 46

Yakop izila pa Isip

1 Tovenen Yakop iyou mbeb toni tisob, ve yesŋa ndinatu ve nditimbu timundig, ve tizila pa Isip. Tilaagh tila le tivot ndug Ber-Seba, ghoro ye igham watooŋrau pa Maaron to tama Isak izi tonowe. 2 Mboŋ tonenen, itandag ighaze Maaron inim toni, ve ipoii ighaze: “Yakop, Yakop!”

Yakop iyok pa aliŋa ighaze: “Taug nene.”

3 Ghoro Maaron isaav pani ighaze: “You Yoova. You Maaron to tamam Isak. Umatughez pa uzila taan Isip malep. Pasa, you pale nalat toman ghom pa laghooŋ tiom, ve nagham papaghu tiom timasa tinim ival kat tonowe. Ve muri, you pale nagham gham amuul anim taan tonene. Ve sawa to mateeŋ tiom, natum Yosep tau pale ineep digem ve igharaat ghom.” ^a

5 Tovenen Yakop toman ndinatu, nditimbu, ve ndirawa liva tiza karis to kinik to Isip isaŋgoor di padi ne, ve tipamundigin laghooŋ todi muul. Tipul ndug Ber-Seba, ve tilaagh toman ŋgai ve mburuguuŋ todi to tigham di izi Kanaan, ve tizila pa Isip. ^b

Pitiiŋ to Yakop papaghu toni

8 Yakop papaghu toni to yesŋa tizila pa Isip ne izadi tovene:

9 Ruben, ye Yakop natu aidaba. Ruben ndinatu, nene: Anok, Palu, Ezron, ve Karmi.

10 Ve Simeon ndinatu, nene: Yemuel, Yamim, Oat, Yakin, Zoar, ve Saul. Saul tina, ye Kanaan tidi.

11 Levi ndinatu, nene: Koat, ve Merari.

12 Ve Yuda ndinatu, nene: Er, Onan, Sela, Peres, ve Zera. Eemoghon Er yesuru Onan timaat izi Kanaan. ^c

Yuda natu Peres, ye ipoop ndinatu nditamoot ru, izadi Ezron ve Amul.

13 Isakar ndinatu, nene: Tola, Pua, Yop, ve Simron.

14 Ve Zebulun ndinatu, nene: Seret, Elon, ve Yalel.

15 Yakop yesuru azuwa Lea tinepneep izi taan suruvu to Mesopotamia, ve tipoop ndinatudi nditamoot tonene toman natudi liva Dina. Tovenen Lea ndinatu ve nditimbu, yes irau tamoot ee saaŋgul ve tol (33).

16 Gat ndinatu, nene: Zipion, Agi, Suni, Ezbon, Eri, Arodi, ve Areli.

17 Ve Aser ndinatu, nene: Imna, Isva, Isvi, ve Beria. Ve livudi iza Sera. Aser natu Beria ndinatu, nene: Eber ve Malkiel.

18 Tamtoghon saaŋgul liim ve eez (16) tonene, nene Lea liva mbesooŋa toni Silpa yesuru Yakop ndinatudi ve nditimbudi. Silpa tonene, Lea tama Laban igham pani inim mbesooŋa toni.

19 Yakop yesuru azuwa Rael ndinatudi, nene: Yosep yesuru Benyamin. 20 Sawa to Yosep inepneep izi Isip, yesuru azuwa Asenat tipoop ndinatudi ru, izadi Manase ve Epraim. Yosep azuwa Asenat, ye Potipera natu liva. Potipera, ye ŋgeu to watooŋrau to ndug On.

21 Benyamin ndinatu, nene: Bela, Beker, Asbel, Gera, Naaman, Ehi, Ros, Mupim, Upim, ve Art.

22 Tamtoghon saaŋgul ve paaŋ (14) tonene, nene Yakop yesuru azuwa Rael ndinatudi ve nditimbudi.

23 Dan ipoop natu ee moghon, iza Usim.

24 Ve Naptali ndinatu, nene: Yazil, Guni, Yezer, ve Silem.

25 Tamtoghon liim ve ru tonene, nene Rael liva mbesooŋa toni Bila yesuru Yakop ndinatudi ve nditimbudi. Bila tonene, Rael tama Laban igham pani inim mbesooŋa toni.

26 Tovenen Yakop ndinatu ve nditimbu to yesŋa tizila pa Isip, yes irau tamoot tol liim ve eez (66). Ve ndirawa liva, nene tinin di toman di maau. 27 Ve ighaze talup Yakop tau, ndinatu, ve nditimbu, toman Yosep ve ndinatu ru to yesuru azuwa Asenat tipoop di izi Isip, nene tinim tamoot tol saaŋgul (70). Yes tonene to tilup di ve tineep izi Isip. ^d

Yakop toman ndinatu ve nditimbu tila tivot izi Isip

28 Yakop toman ndinatu ve nditimbu tila tigharau Isip, ghoro imbaaŋ natu Yuda imuuŋ ila, ve isavia varudi pa Yosep ighaze tama inim ivot taan suruvu to Gosen wa. 29 Tovenen Yosep isaav pa uraata toni ve tigharaat karis pani, ghoro iza ve ila pa Gosen ighaze ighita tama. Ila ivot toni, ghoro isavagi ve itaŋ pani le mala. 30 Ghoro Yakop isaav pani ighaze: “Aa natug, you naghaze pa umaat wa. Eemoghon maau. Aazne, naghita ghom uneep matam iyaryaar. Ighaze namaat, namaat lak!”

31 Ghoro Yosep isaav pa nditogha ve tazi, toman tamtoghon todi pida to yesŋa tinim ne ighaze: “You pale namuul nala to kinik, ve napaes pani naghaze: ‘Tamaŋ, tazig ve nditoghag tipul taan Kanaan, ve tinim tivot wa. 32 Yes ndiran to ŋginiiŋ ŋgai. Tovenen tiyou ŋgai toman mburuguuŋ todi, ve tinim.’ 33 You pale nala toni ve nasaav pani tovene. Ve alooŋ. Yes Isipa lolodi pa tilup toman ndiran to ŋginiiŋ ŋgai maau kat. Tovenen sawa to kinik ipoi gham ala toni, ve ighason gham pa uraat tiam, yam asaav pani tovene aghaze: ‘O tiina tiei, sawa to pain ghei ve inim aazne, yei tamtoghon to ŋginiiŋ ŋgai ninimale nditimbumai.’ Ighaze yam asaav pani tovene, ye pale iyok pa aneep izi taan suruvu to Gosen tonene.”